كلام الليل المدهون بزبدة

على مقهى في الشارع الافتراضي...

- إزاي يا أخي الحكومة سابت الإخوان ياخدوا ٢٠٪ من البرلمان؟
= مين قال إنّهم سابوهم؟ ما يمكن خدهم الغرور وما توقعوش إنّهم يوصلوا لكده.
- غرور إيه يابني، هو برنامج أطفال! ماهو كان ممكن يمنعوهم من الترشيح زي زمان أو يعتقلوهم.
= يعني عايز تقول إنّهم متفقين؟
- يعني تفتكر فوّتوا لهم كام كرسي لغرض في نفسهم؟
= فاكر من شهرين لما كنت بتسأل إزاي الحكومة سابت أيمن نور يروح يمين وشمال ويقول اللي يقوله، وكمان ياخد فوق الـ١٠٪ من الريّس؟
- كانت حركات علشان أمريكا...
= خلوا شكل الانتخابات حلو وشيك، ودلوقتِ أهو في السجن. إزيّك بقى؟
- بس أيمن مش زي الإخوان. دول ٨٨ واحد، مش معقول هيلفقولهم ٨٨ قضيّة؟
= مين قال؟ ممكن شويّة قضايا تزوير تلاقي بعدها البرلمان اتحل
- لا لا.. مش ممكن يحصل. دي البلد تولع.. هم فتحوا الباب ومش ممكن يقفلوه
= أو يمكن يستفيدوا بوجودهم في المجلس علشان أهدافهم برضه
- إنت خيالك واسع قوي. ليه ما تعترفش إنّ الحكومة رضخت للضغط الشعبي
= شعبي؟؟ إنت برضه قلت لي كده في انتخابات الرياسة
- طب وآخرتها؟
= خليك في حالك واشرب الشاي...