أنا وبابا والظواهري

أنا وبابا والظواهري
ـ فصل من حياة عيّل ـ

حيث إنّ كلام الكبار ما عادش نافع، خذوا الحكمة من أفواه الأطفال...
ـ
source: BBC

ـ بابا.. مين دول*؟
ـ دول يا حبيبي الناس اللي فرقع فيهم المترو والأوتوبيس في لندن الشهر اللي فات.
ـ يا حراام!! ماتوا؟
ـ أيوه طبعاً.. كان انفجار ضخم قوي
ـ هم كانوا وحشين؟
ـ هه؟ لا؟ آه؟ أقصد ما اعرفش، مش كلّهم.. الله أعلم يابني، دي ناس كتير، فيهم الكويّس وفيهم الوحش.
ـ ماتوا ليه؟
ـ قدرهم يا ابني. إنت مش هتاكل سندوتش الجبنة علشان تكبر وتبقى أطول منّي؟
ـ ويفرقع فيّ الأوتوبيس؟؟؟؟

*****

ـ بابا بابا... مين الراجل الي عالجزيرة ده.. إنت متابعه كده ليه؟ أنا عايز الفيلم!
ـ استنّى يا حبيبي.. خلّينا نسمع، المذيع الحمار مغطّي على كلامه
ـ ده شكله زعلان قوي. المَتْفَع ده حقيقي ولا لعبة؟
ـ شششش
ـ مين ده يا بابا؟
ـ ده الشيخ.. امم. الدكتور أيمن الظواهري. ده يا حبيبي كان معايا في الكليّة. ومدوَّخ الدنيا كلّها دلوقتِ.
ـ طب وليه مكشّر كده، وحاطط المتفع جنبه ليه؟
ـ هو بيقول إنّ توني بلير زنبه على جنبه علشان عمايله.
ـ مين توني ده. الواد توني اللي معايا في الفصل برضه غلس وأنا هاضربه تاني بكره لو جاه جنب السندوتش بتاعي. على طول يرمي ساندوتشات الفول بتاعته، وياخد لحمة حلْواني بتاعتي.
إيه بقى عمايله؟

source: toostupidtobepresident.com (will play a movie)

ـ يا حبيبي ده كلام معقّد. هو توني بلير ده زي رئيس إنجلترا كده، وهو اللي جابه لنفسه علشان وقف مع بوش وحارب أفغانستان والعراق.
ـ طب وأنكل أيمَن ضربه على كده؟
ـ أنكل؟ مش أنكل يا سمسم.. أنا بس كنت باشوفه من بعيد في الكليّة... إنت هتجيبلي نصيبة؟!
لأ.. ما قدرش يضربه، بس هو بيقول إنّه يستاهل اللي حصل في لندن ولسّة هيشوف اللي هيجراله.
ـ لندن؟ هو ده اللي فرقع الأوتوبيس.
ـ أوتوبيس؟ إنت لسّة فاكر؟ ما حدّش عارف. الجزيرة بتقول ما فيش إثبات. لكن هو بيقول إنّه يستاهل الفرقعة.
ـ هو الأوتوبيس كان بتاع توني الحمار ده؟
ـ لا يعني.. بس في وشّه. لما يموت له خمسين واحد، معناها إنّه مش عارف يحمي شعبه.
ـ بس هو أيمن استفاد إيه؟ لو مش هو اللي عملها، ولو توني ما حصلّوش حاجة؟ أمّا عبيط صحيح.
ـ بسّ ما تقولش كده. ده راجل ضحّى بعمره كلّه.
ـ طب والناس دول ذنبهم إيه؟
ـ ما هو كمان إخواتنا في العراق وفلسطين والبوسنة ذنبهم إيه؟
ـ هم ليه بتوع لندن مش إخواتنا؟
ـ إيه؟ أصلهم شُقر، إزّاي يبقوا إخواتنا؟
... إيه ده. إنت لسّة ما لعبتش حرب الفضاء اللي جبتهالك عالپلاي ستيشن؟ روح العب واضربهم كلّهم...

*****

ـ يا باباااااااا
ـ إيه.. هه.. يابني فزعتني، كنت عايز أنام الضهر. الپلاي ستيشن باظت؟
ـ لأ.. بص في الصور. مش كُلُّهم شُقر يا بابا.. فيهم ناس سُمر وسود كمان. يعني كان فيهم ناس ينفعوا إخواتنا!
ذنبهم إيه؟
ـ قدرهم بقى. عمرهم، وربّنا عارف الأحسن لكلّ واحد، يمكن ده أحسن لهم.
ـ إنت قلت مش كلّهم وحشين.. يعني ممكن يروحوا الجنّة؟
ـ يابني الله أعلم.. إحنا مالنا بالناس. الكويّس هيروح الجنّة، بلاش تسأل في الحاجات دي، ما يصحّش.
ـ وأيمن أبو مَتْفع ده هيروح الجنّة معاهم ولا النار مع توني الجبان؟
ـ همم.. يابني دي حاجة بتاعة ربّنا، هو اللي يحكم في الناس مش إحنا.
ـ أنا بس مش عارف لو أيمن راح الجنّة مع حدّ بتوع الأوتوبيس اللي فرقع، هيورّيهم وشّه إزّاي؟ هيقولّهم توني هو السبب؟

*****

ـ"أليسَ من العجيب أنّنا نقتل الذين يقتُلون بحجّة أنّهم يقتلون من يقتلون لنعلن أنّ القتل خطأ؟"ـ

ــــ
* هل تعرف من هؤلاء؟
هؤلاء الممثلون في الصور هم ضحايا انفجارات لندن الشهر الماضي، قصصتُ بعضها من صفحة هيئة الإذاعة البريطانيّة، وكدتُ أملّ وأكتفي باثنين أو ثلاثة، لولا أن ّ خاطرةً عنّت لي وأصابتني بالقشعريرة: أنّ وراء كلّ صورة حياةٌ كاملةً ذهبت وانتهت.
ـ