تليفونات

ـ قمت بتحديث هذه التدوينة تحديثاً ملحوظاً في العاشرة والنصف بالتوقيت الصيفيّ لوسط الولايات المتّحدة ـ

ـ حلوة قوي المدوّنة بتاعتك فعلاً. بس خلّيك بقى في الحاجات اللي دمّها خفيف اللي إنت معوّدنا عليها، بلاش دخول في الدين والسياسة!
ـ أمّال أكتب في إيه بس؟ وبعدين أنا بس باطرح تساؤلات، وماشي جنب الحيط.
...
ـ وبعدين معاك. فرعون كبير إيه اللي بتكتب عنّه. أنا فاهم قصدك مين كويّس... ومين حاء كمان بتاع مذبحة القلعة؟
ـ الفرعون الكبير ده مدوِّن !!
حاء... هاها.. ما جاتش في بالي خالص، كان قصدي "حد" تاني :)
...
ـ الله. إنت كمان مش عاجبك بوش وكوندوليزا. ده أنت عايش في خيرهم.
ـ مالهم دول كمان. أهم دول بالذات مهاجمتهم مش خطر. بالعكس، دي موضة.
...
ـ إيه ده بقى.. ما تخفّ شويّة. إنت مالك ومال الانتخابات. طبعاً هو أحسن واحد موجود، وأيمن نور مزوِّر والجيش مش معاه.
ـ أنا ما قلتش حاجة؛ أنا باعلّق على خبر موجود في الجرايد.
...
- وبابا روما: مبارك السادس عشر؟ "زيتنا في دقيقنا"؟ ليه الكلام ده؟
- دا ترجمة اسم بابا الفاتيكان، والزيت في الدقيق ده يعني نفس السياسة المحافظة. ما أقصدش حد تاني...
...
ـ لاا.. إنت زوّدتها قوي. كلّه إلا المظاهرات. اللي يعمل مظاهرة يستاهل اللي يجراله. إنت أصلك ما عشتش أيّام الستينات، إحنا في نعمة.
ـ إنتوا في نعمة علشان وضعكم اتحسّن. لكن إحنا؟ وبعدين أنا بعلّق على حدث حصل بالفعل. فضيحة يعني من الآخر!
وكمان أنا نفسي ييجي يوم أقول للي بعدي: إنتوا في نعمة، إنتوا أصلكم ماعشتوش أيّام بندكتس...
...
ـ البابا شنودة والسادات كمان؟
ـ مش شبه بعض بالذمّة في الصور. أقصد الاتنين ولاد آدم، وبيقعدوا على الأرض!
...
ـ لا بقى. كده كفاية قوي. وكمان بتكتب عن الظواهري؟ إنت هتلاقيها منين ولا منين. فاضل مين ما زعّلتوش.
ـ أنا قلت حاجة؟ ده أنا باحلّل كلامه وأشوف تأثيره على الناس.
ـ كفاية بقى، علشان خاطر كريم حتّى.
ـ لكن يا بابا،
ـ ما فيش لكن...

ـ
والعبرة من الحدّوتة:
رفقاً بوالديكم، لا تعطوهم عنوان مدوّناتكم.

اقرأ أيضاً:
عندما تكتشف أمّك بلوجّك (رابط في: أمّك ورئيسك وبلوجك)
والتداعيات: (تحديث ١٤ أغسطس)
ـ محمد والعائلة
ـ سقراط وشللو والإنجيل والقرآن
ـ